Aktiviteti “Zjarri i Lirisë” u përmbyll në Zonën Operative të Karadakut, duke shënuar fundin e një rrugëtimi që përfshiu shtatë zona operative të Ushtrisë Çlirimtare të Kosovës. Ky aktivitet bashkoi ish-ushtarë, veteranë, familje të dëshmorëve dhe qytetarë të Karadakut për të përcjellë mesazhin e përbashkët se lufta e UÇK-së ishte për liri dhe se historia e saj duhet mbrojtur me dinjitet. Nga Karadaku u kërkua drejtësi dhe liri për çlirimtarët që ndodhen në Hagë, duke ritheksuar nderimin për sakrificën dhe vlerat mbi të cilat është ndërtuar liria e Kosovës. Përmbyllja e këtij aktiviteti shënon nisjen e Marshit për Liri, që do të mbahet më 12 shtator në Prishtinë, ku do të marshojnë bashkë për lirinë, çlirimtarët dhe UÇK-në.