Qeveria e Kosovës ka miratuar vendimin përfundimtar për shpronësimin e pronave të ish-Kombinatit Bujqësor Industrial “Ereniku” në Gjakovë, me qëllim ndërtimin e Zonës Industriale të Mbrojtjes. Në këtë hapësirë prej mbi 130 hektarësh do të ndërtohet fabrika e parë në vend për prodhimin e municioneve, projekt ky që përfaqëson një avancim strategjik në kapacitetet shtetërore të mbrojtjes. Ministri në detyrë i Mbrojtjes, Ejup Maqedonci, ka theksuar se kjo zonë do të shërbejë si bazë për zhvillimin e industrisë së mbrojtjes dhe forcimin e sigurisë kombëtare. Ky projekt pritet të ketë ndikim të rëndësishëm në zhvillimin industrial dhe në rritjen e pavarësisë së vendit në fushën e sigurisë.