Bordi i Zyrës së Rregullatorit për Energji (ZRRE) ka reaguar ndaj raportimeve mediale që pretendonin se nuk ka raportuar në Komisionin Parlamentar për Ekonomi, Industri, Ndërmarrësi, Tregti dhe Inovacion, duke i cilësuar ato të pasakta. ZRRE ka bërë të ditur se ka konfirmuar pjesëmarrjen dhe ka qenë fizikisht i pranishëm në Kuvendin e Republikës së Kosovës, i gatshëm për të raportuar dhe për t’iu përgjigjur pyetjeve të deputetëve. Megjithatë, mbledhja e Komisionit nuk u zhvillua për shkak të mungesës së kuorumit, pasi deputetët nga Lëvizja Vetëvendosje nuk ishin të pranishëm në sallë. Bordi i ZRRE-së shpreh keqardhje për keqinformimin e opinionit publik nga disa media dhe fton mediat që të verifikojnë informacionin përpara publikimit për të siguruar informim të saktë dhe zyrtar.