Ministria e Brendshme e Shqipërisë ka publikuar listën zyrtare me 16 kandidatë për postin e Drejtorit të Përgjithshëm të Policisë së Shtetit, ku përfshihen edhe dy gra, Suela Sulkaj dhe Ejona Gurabardhi. Brenda 10 ditëve pune, Komisioni i Posaçëm do të kryejë vlerësimin paraprak për të verifikuar plotësimin e kushteve ligjore të kandidatëve dhe do të përjashtojë ata që nuk i plotësojnë këto kushte, duke i njoftuar me shkrim për arsyet e përjashtimit. Pas kësaj, Komisioni do të organizojë seanca dëgjimore me kandidatët, të cilëve do t’u njoftohet paraprakisht data e seancës së paktën 3 ditë më parë. Në përfundim, Komisioni do të hartojë renditjen e kandidatëve bazuar në vlerësimet dhe informacionin e mbledhur, dhe do t’i dorëzojë Ministrit të Brendshëm për vendimmarrje të mëtejshme.