Kryeministri Edi Rama njoftoi se deri në vitin 2027 në Tiranë do të jepen 7 mijë banesa të reja për strehim, duke finalizuar planin për t’i dhënë fund periudhës së rindërtimit në zona si Kombinati dhe 5 Maji. Ai theksoi se fondi kombëtar i strehimit do të mbështetet nga taksat lokale, fondet e Bashkimit Europian dhe do të funksionojë me një formulë që përfshin banesa sociale, të përballueshme dhe me qëllim fitimi. Bashkitë do të bashkëpunojnë me entin e banesave, i cili do të kthehet në kompani publike dhe do të investojë përmes partneriteteve, jo tenderave. Rama kritikoi mënyrën e menaxhimit të kryeqytetit në të kaluarën, duke e quajtur një eksperiment të dështuar social, dhe njoftoi se së shpejti do të publikohen thirrjet për aplikime në programin e ri të strehimit.