Kryetari i Kuvendit të Maqedonisë së Veriut, Afrim Gashi, shprehu bindjen se nuk do të ketë zgjedhje të parakohshme, pavarësisht diskutimeve të fundit në lidhje me miratimin e Kodit Zgjedhor. Në një takim koordinues me grupet parlamentare, u theksua rëndësia e miratimit të këtij ligji si pjesë e reformave për integrimin evropian të vendit. Gashi theksoi se grupi i punës për Kodin Zgjedhor është aktiv dhe se hapja e kësaj çështjeje është një hap pozitiv për zhbllokimin e punës së Kuvendit. Ai gjithashtu bëri me dije se po bën përpjekje maksimale për të avancuar miratimin e ligjeve të tjera të rëndësishme, por theksoi se rezultati varet nga bashkëpunimi i deputetëve dhe partive politike.