Më 23 qershor nis afati i dytë për regjistrimin në shkollat e mesme në Maqedoninë e Veriut për vitin shkollor 2026/2027, ku nxënësit që nuk u regjistruan në afatin e parë do të kenë mundësi të aplikojnë përsëri në mënyrë elektronike. Më 24 qershor duhet të dorëzojnë dokumentacionin në shkollat përkatëse, ndërsa më 25 qershor do të publikohen listat e renditjes me rezultatet e regjistrimit. Në rast të barazimit të pikëve, do të organizohet testim kualifikues më 29 qershor, ditë kur do të shpallen edhe listat përfundimtare. Ministria e Arsimit ka bërë të ditur se për këtë afat ka 11.882 vende të lira në gjuhë të ndryshme, ndërsa disa shkolla dhe sektorë tashmë kanë mbyllur konkursin për regjistrim në afatin e dytë.