Ali Ahmeti, kryetari i Bashkimit Demokratik për Integrim, në 35-vjetorin e pavarësisë së Maqedonisë së Veriut, ka bërë thirrje për reflektim mbi rrugën dhe të ardhmen e shtetit. Ai ka theksuar se për shumë vite shqiptarët dhe komunitetet joshumicë nuk janë ndjerë pjesë e barabartë e shtetit, duke e cilësuar këtë si një padrejtësi historike dhe model të paqëndrueshëm shtetëror. Ahmeti ka vlerësuar Marrëveshjen e Ohrit si një pikë kthese që zhvendosi vendin nga dominimi i shumicës drejt bashkëjetesës, barazisë dhe përgjegjësisë së përbashkët, duke forcuar shtetin unitar dhe demokratik.