Akuaparku në Qendrën Sportive “Boris Trajkovski” në Shkup do të qëndrojë i mbyllur edhe gjatë kësaj vere për shkak të gjendjes së keqe të objektit dhe nevojës për rinovim të plotë. Drejtori Daniel Apostolovski ka bërë me dije se për rikonstruksionin nevojiten rreth 1 milion euro, por aktualisht nuk ka fonde të mjaftueshme për këtë investim. Vendimi për mbylljen e akuaparkut u mor në vitin 2024, pas një raporti revizioni që evidentoi mungesën e rentabilitetit ekonomik dhe skadimin e garancisë së pajisjeve. Ndërkohë, fokusi i institucionit është përqendruar te renovimi i pishinës, pasi në vitin 2023 akuaparku realizoi të ardhura shumë më të ulëta se sa ishte parashikuar.