Kryeministri kroat Andrej Plenkoviq ka dënuar fuqishëm akuzat e zyrtarëve serbë, të cilët pretendojnë se Kroacia po mbështet protestat antiqeveritare në Serbi. Ai i ka cilësuar këto pretendime si narrativa të fabrikuara dhe dezinformim politik, duke theksuar se Kroacia nuk ndërhyn në çështjet e brendshme të Serbisë. Nga ana tjetër, kryetarja e Parlamentit serb, Ana Brnabiq, ka akuzuar Zagrebin për përpjekje për rrëzimin e pushtetit në Beograd, duke sugjeruar se disa qytetarë serbë luftojnë për interesat strategjike të Kroacisë. Reagimet vazhdojnë me kritika reciproke, ndërsa zyrtarët kroatë i bëjnë thirrje Serbisë të përqendrohet në zhvillimin ekonomik dhe theksojnë rritjen e numrit të qytetarëve serbë që punojnë në Kroaci.