LSDM i ka bërë thirrje kryeministrit Hristijan Mickoski që të marrë përgjegjësi për veprimet e zyrtarëve të koalicionit të tij, Ivan Stoilkoviq dhe Dalibor Kitanoviq, të cilët akuzohen për deklarata fyese dhe përkrahje të figurave të diskutueshme. Stoilkoviq, pjesë e qeverisë, është kritikuar për fyerje ndaj deputetëve dhe lavdërim të Ratko Mladiçit në Kuvend, ndërsa Kitanoviq, drejtor i Agjencisë për të Drejtat e Komuniteteve, ka bërë deklarata që përfshijnë lëvdata për persona të akuzuar për spastrim etnik. Përveç tyre, LSDM përmend edhe Mirosllav Triçkoviqin për përmbajtje fyese dhe gjuhë urrejtjeje ndaj partisë dhe kryetarit të saj, Venko Filipçe. Mungesa e dorëheqjeve apo shkarkimeve nga ana e Mickoskit interpretohet si mosmarrje përgjegjësie dhe mbështetje e heshtur për këto veprime, duke u cilësuar si pjesë e një ekipi që lidhet me interesat e Vuçiqit.