Instituti Kombëtar i Shëndetit Publik të Kosovës (IKSHPK) ka ngritur alarmin për ndotjen e lartë të ajrit në zonën e Obiliqit, ku termoelektranat Kosova A dhe B janë burimi kryesor i emetimeve ndotëse. Sektori energjetik përgjegjës për rreth 40% të ndotjes, lëshon substanca të rrezikshme si ozoni, oksidet e azotit, dioksidi i squfurit dhe grimcat PM10 dhe PM2.5, të cilat ndikojnë drejtpërdrejt në rritjen e sëmundjeve respiratore dhe kardiovaskulare, sidomos tek grupet vulnerabël si fëmijët, të moshuarit dhe personat me sëmundje kronike. IKSHPK paralajmëron se nëse nuk merren masa urgjente, do të ketë rritje shqetësuese të vdekshmërisë dhe sëmundshmërisë në popullatë.