Organizatat civile në Maqedoni kanë reaguar fuqishëm pas vrasjes së një gruaje 31-vjeçare në Manastir, duke e cilësuar ngjarjen si një femicid dhe një sinjal alarmi për sigurinë e grave në vend. Ata theksojnë se rritja e rasteve të dhunës ndaj grave tregon dështim institucional në parandalimin dhe mbrojtjen e viktimave, duke kërkuar hetim të plotë dhe transparent të rastit, përfshirë verifikimin e denoncimeve të mëparshme. Organizatat kërkojnë përgjegjësi nga institucionet dhe zyrtarët që nuk kanë vepruar sipas ligjit, si dhe forcim urgjent të mekanizmave mbrojtës, përfshirë investime në shërbime të specializuara, kapacitete policore dhe programe parandaluese në arsim. Ata paralajmërojnë se dhuna ndaj grave po shndërrohet në një “epidemi shoqërore” që kërkon ndërhyrje të menjëhershme nga shteti.