Ministri i Punëve të Jashtme i Bosnjë e Hercegovinës, Elmedin Konakoviq, ka bërë thirrje urgjente ndaj liderëve perëndimorë për të reaguar ndaj glorifikimit të kriminelit të luftës Ratko Mladiq në Serbi, pas nderimeve shtetërore dhe ushtarake që iu bënë atij në Beograd. Ai ka dërguar letra zyrtare në Bruksel dhe Uashington, duke kërkuar përgjigje të qarta dhe shqyrtimin e sanksioneve ndaj zyrtarëve dhe institucioneve serbe që mbrojnë dhe glorifikojnë kriminelët e luftës dhe mohojnë gjenocidin në Bosnjë e Hercegovinë. Konakoviq paralajmëron se kjo nuk është vetëm një çështje e së kaluarës, por një kërcënim serioz për stabilitetin, besimin dhe perspektivën evropiane të rajonit. Ai ka paralajmëruar gjithashtu reduktimin në nivelin më të ulët të marrëdhënieve diplomatike me Serbinë, duke përfshirë tërheqjen e pjesës së personelit të ambasadës së Bosnjë e Hercegovinës në Beograd.