Ministri në detyrë i Infrastrukturës dhe Transportit, Dimal Basha, ka përshëndetur nënshkrimin e kontratës për ndërtimin e autostradës Shkup – Bllacë, duke e cilësuar këtë projekt si një hap kyç për ndërlidhjen infrastrukturore mes Kosovës dhe Maqedonisë së Veriut. Ai ka theksuar se kjo autostradë përfaqëson vazhdimin e një korridori rajonal strategjik dhe do të lehtësojë qarkullimin e qytetarëve dhe mallrave, duke forcuar bashkëpunimin ekonomik ndërmjet dy vendeve. Ministri shpreson që punimet të përfundojnë brenda afateve të parapara dhe ka vlerësuar rëndësinë e investimeve infrastrukturore për zhvillimin ekonomik dhe integrimin rajonal. Projekti, me një vlerë prej 200 milionë eurosh, përfshin edhe ndërtimin e 10 kilometrave të mbetura në territorin e Maqedonisë së Veriut, të cilat pritet të përfundojnë në kohë.