Komisioni Evropian ka propozuar nisjen e negociatave me gjashtë vendet e Ballkanit Perëndimor – Kosovën, Shqipërinë, Serbinë, Malin e Zi, Bosnjën e Hercegovinën dhe Maqedoninë e Veriut – për t’i përfshirë ato në zonën e roamingut falas të Bashkimit Evropian, të njohur si “Roam Like at Home”. Kjo do t’u mundësojë qytetarëve të këtyre vendeve të përdorin telefoninë mobile për thirrje, mesazhe dhe internet pa tarifa shtesë kur udhëtojnë brenda BE-së dhe Ballkanit Perëndimor. Procesi kërkon miratimin e Këshillit Evropian dhe arritjen e marrëveshjeve bilaterale me secilin shtet, si dhe harmonizimin e plotë të rregullave të roamingut me ato të BE-së. Komisionarja për Zgjerim, Marta Kos, theksoi se tarifat e roamingut janë një problem i madh për qytetarët dhe punëtorët që udhëtojnë në rajon, ndërsa zëdhënësi i KE-së njoftoi se afatet kohore varen nga gatishmëria e vendeve për të përmbyllur marrëveshjet.