Pas protestës së studentëve shqiptarë në Shkup që kërkonin mbajtjen e provimit të jurisprudencës në gjuhën shqipe, nënkryetari i BDI-së, Bujar Osmani, akuzoi një politikë të qëllimshme dhe të organizuar për dobësimin e përdorimit të gjuhës shqipe në institucionet shtetërore. Ai rikujtoi procesin e tensionuar të miratimit të Ligjit për Gjuhët, ku opozita e VMRO-DPMNE-së kishte penguar votimin dhe ish-presidenti Gjorge Ivanov kishte refuzuar nënshkrimin e ligjit, duke e detyruar rivotimin në Parlament. Osmani kritikoi ndërhyrjet institucionale që kanë dobësuar zbatimin e ligjit, përfshirë heqjen e pavarësisë së Inspektoratit dhe reduktimin e rolit të Agjencisë për gjuhët, si dhe ndryshimet në identitetin vizual të institucioneve dhe largimin gradual të gjuhës shqipe nga dokumentet dhe tabelat zyrtare. Ai paralajmëroi përgatitjen e një narrative që synon ndryshimin e dispozitave kyçe të ligjit, duke e cilësuar këtë si vazhdimësi të një politike të planifikuar për dobësimin e gjuhës shqipe.