Ministri i Punëve të Jashtme dhe Tregtisë së Jashtme të Maqedonisë së Veriut, Timço Mucunski, gjatë vizitës së tij në Irlandë, theksoi rëndësinë e procesit të zgjerimit të Bashkimit Evropian si një proces të bazuar në merita dhe kritere objektive. Ai nënvizoi nevojën për energji të re politike në këtë proces dhe theksoi se Ballkani Perëndimor duhet të jetë pjesë integrale e vizionit evropian për siguri, stabilitet dhe prosperitet, duke mos mbetur në margjina. Në fjalimin e tij në Institutin për Çështje Ndërkombëtare dhe Evropiane në Dublin, Mucunski përshëndeti mbështetjen e Irlandës ndaj politikës së zgjerimit dhe perspektivës evropiane të rajonit. Ai konfirmoi se anëtarësimi i plotë në Bashkimin Evropian mbetet qëllimi strategjik dhe i pandryshuar i Maqedonisë së Veriut.