Presidenti i Shqipërisë, Bajram Begaj, zhvilloi një vizitë zyrtare në Sllovaki ku u takua me homologun e tij Peter Pellegrini dhe diskutuan thellimin e marrëdhënieve dypalëshe dhe perspektivën evropiane të Shqipërisë dhe Ballkanit Perëndimor. Begaj vlerësoi mbështetjen e vazhdueshme të Sllovakisë në procesin e integrimit të Shqipërisë në Bashkimin Evropian, duke theksuar progresin e shpejtë në negociata dhe synimin për anëtarësim të plotë në vitin 2030. Në fokus ishin edhe bashkëpunimi në fusha si energjia, turizmi, bujqësia dhe shëndetësia, si dhe rëndësia e linjave të reja direkte të fluturimit që do të forcojnë lidhjet mes dy vendeve. Presidenti Begaj theksoi gjithashtu rëndësinë strategjike të stabilitetit në Ballkanin Perëndimor për sigurinë evropiane dhe falënderoi Sllovakinë për kontributin e saj në KFOR dhe mbështetjen për rrugëtimin evropian të Shqipërisë.