Ministria e Brendshme e Shqipërisë ka shpallur “non grata” dy shtetas të Maqedonisë së Veriut, përfshirë Bekir Halimin, për shkak të veprimtarive të dyshuara kundër interesave të shtetit shqiptar. Halimi ka reaguar duke thënë se ende nuk ka marrë një konfirmim zyrtar për këtë vendim dhe se po pret të verifikojë situatën përmes Ambasadës së Maqedonisë së Veriut në Tiranë. Ai po ashtu njoftoi se është në proces për marrjen e nënshtetësisë shqiptare dhe deri atëherë i nënshtrohet ligjeve të shtetit të tij. Bekir Halimi mohoi lidhjet me organizata kombëtare apo ndërkombëtare dhe theksoi se angazhimi i tij ka qenë vetëm në luftërat çlirimtare të UÇK-së dhe në detyrën e tij si hoxhë brenda Bashkësisë Fetare Islame të Maqedonisë së Veriut.