Fondacioni bullgar "Maqedonia" ka paralajmëruar bllokimin simbolik të tre pikave kufitare me Maqedoninë e Veriut këtë të dielë, në një aksion të koordinuar me Ministrinë e Punëve të Brendshme të Bullgarisë. Bllokada do të zgjasë dy orë, nga ora 11:00 deri në 13:00, dhe ka për qëllim të dërgojë një mesazh të fortë kryeministrit maqedonas Hristijan Mickoski për të ndalur, siç thuhet, persekutimin dhe vendimet gjyqësore kundër bullgarëve në Maqedoni. Ky veprim vjen pas incidentit të djegies së dy automjeteve diplomatike në Ambasadën Bullgare në Shkup, i cilësuar si akt terrorizmi. Fondacioni thekson se bllokada nuk synon të pengojë qytetarët në kalimin e kufirit, por të tregojë se nuk do të lejohet vazhdimi i represionit ndaj bullgarëve në Maqedoninë e Veriut.