Këshilli i Ministrave i Bosnjës dhe Hercegovinës ka vendosur sanksione ndaj 11 shtetasve të saj, duke ngrirë pasuritë dhe mjetet financiare të tyre për lidhjet me organizatat terroriste Shteti Islamik (IS) dhe Al-Nusra. Mes të sanksionuarve është edhe Nusret Imamoviq, një udhëheqës radikal selefist që jeton në Siri dhe është në listat e organizatave ndërkombëtare kundër terrorizmit. Vendimet përfshijnë edhe persona të tjerë që supozohet se ndodhen në Siri, ndërsa masat janë marrë për të mbrojtur sigurinë kombëtare dhe për të përmbushur obligimet ndërkombëtare të Bosnjës. Sipas të dhënave, rreth 300 shtetas boshnjakë kanë shkuar në zonat e konfliktit në Siri dhe Irak gjatë viteve 2012-2016, ku disa janë vrarë, disa janë kthyer, ndërsa mbi 100 persona, kryesisht gra dhe fëmijë, vazhdojnë të mbahen në kampe në veri të Sirisë.