Autoritetet bullgare kanë kthyer në Maqedoninë e Veriut një ngarkesë prej 11.6 tonësh speca të freskët, pasi analizat laboratorike zbuluan praninë e pesticideve formetanat mbi nivelin e lejuar. Ngarkesa u ndalua në pikën kufitare të Zlatarevos dhe u mbajt në depo frigoriferike deri në përfundimin e analizave, ndërkohë që specat nuk arritën të shpërndaheshin në tregjet bullgare. Agjencia Bullgare e Sigurisë Ushqimore urdhëroi kthimin e të gjithë sasisë te furnizuesi në Maqedoninë e Veriut, pa bërë të ditur vendndodhjen e origjinës apo emrin e prodhuesit. Ky kontroll është pjesë e një mbikëqyrjeje të shtuar bullgare ndaj frutave dhe perimeve të importuara nga Maqedonia, Kosova dhe Shqipëria.