Në Koretin të Kamenicës është hapur çerdhja e re “Filizat”, një institucion i dedikuar për edukimin, socializimin dhe zhvillimin e fëmijëve në një ambient të sigurt dhe të përshtatshëm. Ceremonia e hapjes u mbajt me pjesëmarrjen e kryetarit të komunës Kadri Rahimaj, nënkryetares Arta Bajralija, drejtorit të Arsimit Selami Klaiqi, stafit të çerdhes, prindërve dhe fëmijëve. Drejtoresha Merita Keqmezi theksoi rëndësinë e këtij institucioni për mirëqenien dhe edukimin e fëmijëve, ndërsa kryetari Rahimaj e cilësoi këtë investim si një nga më të rëndësishmit për komunitetin, duke theksuar se pas më shumë se 40 vitesh Komuna po funksionalizon çerdhjen e dytë. Drejtori i Arsimit, Selami Klaiqi, vuri në dukje se hapja e çerdhes është një dëshmi e përkushtimit institucional për krijimin e kushteve më të mira për fëmijët dhe familjet e Kamenicës, duke nënvizuar rëndësinë e edukimit që fillon që në moshat më të hershme.