Presidenti serb Aleksandar Vuçiq u përfshi në një debat të ashpër gjatë një emisioni në televizionin publik RTS, ku ngriti zërin dhe kritikoi moderatorin Zoran Stanojeviq pas pyetjeve lidhur me rastin e ndjeshëm “Neshoviq”, që përfshin pretendime për përfshirje të zyrtarëve të policisë në aktivitete kriminale. Vuçiq akuzoi moderatorin për ndjekje të narrativave politike dhe përshtatje me agjenda të caktuara, duke shmangur një përgjigje të drejtpërdrejtë mbi çështjen. Gjatë debatit, presidenti kritikoi mediat dhe opozitën, duke pretenduar se ndaj tij po zhvillohen fushata politike dhe akuza të pabazuara, ndërsa theksoi se ka ndërgjegje të pastër dhe është i gatshëm të përgjigjet para publikut. Pamjet e tensionuara të emisionit u shpërndanë gjerësisht në rrjetet sociale dhe media në rajon, duke nxitur diskutime të shumta.