Kuvendi Komunal i Mitrovicës së Veriut miratoi me 10 vota për dhe 5 kundër kërkesën e Lista Serbe për largimin e mbishkrimit “Unë e dua Mitrovicën”, i vendosur nga administrata e kaluar në tetor të vitit 2025. Kjo pikë u shtua në rend dite në momentet e fundit, duke shkaktuar reagime për mungesë transparence dhe improvizim procedural nga disa këshilltarë dhe parti politike. Kundërshtuesit, përfshirë asamblistë nga iniciativa “Sever za Sve”, “Srpska Demokratija”, Lëvizja Vetëvendosje dhe Partia Demokratike e Kosovës, theksuan nevojën për debat institucional serioz dhe paralajmëruan për pasoja nga vendime të nxituara. Ky debat lidhet edhe me ndryshimet e mëparshme të simboleve komunale, ku mbishkrimi në cirilik u zëvendësua me versionin në alfabet latin dhe stemën e re komunale.