Bashkimi Demokratik për Integrim (BDI) ka reaguar ashpër ndaj Ligjit për Përfaqësim të Drejtë dhe Adekuat, duke akuzuar koalicionin VLEN se nuk garanton mbrojtjen e të drejtave të shqiptarëve në institucionet shtetërore. Sipas BDI-së, ligji është proceduar pa kuota etnike, pa mekanizma zbatimi dhe pa sanksione për shkelësit, duke mos ofruar garanci reale për përfaqësimin e drejtë dhe adekuat. Partia opozitare thekson gjithashtu mungesën e mbështetjes së deputetëve shqiptarë në Kuvend, duke e konsideruar këtë një shenjë të mungesës së legjitimitetit etnik të qeverisë aktuale. BDI ka paralajmëruar se do të vazhdojë të bllokojë çdo përpjekje që, sipas saj, cenon të drejtat kolektive të shqiptarëve dhe do të mbrojë zbatimin e standardeve kushtetuese dhe parimet e Marrëveshjes së Ohrit.