Gjykata e Apelit në Shkup ka nxjerrë një vendim të formës së prerë duke rritur dëmshpërblimin për Ziadin Selën, i cili u sulmua gjatë ngjarjeve të dhunshme në Kuvend më 27 prill 2017. Shteti i Maqedonisë së Veriut është detyruar t’i paguajë Selës 7.8 milionë denarë për dëmtimin e të drejtave personale dhe shëndetit fizik e psikik, një shumë shumë më e ulët se kërkesa fillestare prej 61 milionë denarësh. Gjykata ka argumentuar se vendimi i shkallës së parë nuk kishte vlerësuar në mënyrë të duhur seriozitetin e dëmit dhe nuk kishte marrë parasysh të gjitha rrethanat relevante për një kompensim të drejtë. Nga shuma totale, janë ndarë mjete për dhimbje fizike, frikë, dhimbje shpirtërore, si dhe për cenim të dinjitetit, nderit dhe reputacionit, ndërsa Avokatura e Shtetit ka parë ankesën e saj si të pabazuar dhe është refuzuar.