Komisioni për Politikë të Jashtme i Kuvendit të Maqedonisë së Veriut nuk miratoi projektrezolutën për respektimin e standardeve në procedurat penale kundër ish-udhëheqësve të UÇK-së, pasi deputetët maqedonas bojkotuan mbledhjen dhe penguan sigurimin e kuorumit të nevojshëm për vendimmarrje. Në seancë morën pjesë vetëm deputetët shqiptarë nga Fronti Evropian, VLEN-i, Aleanca për Shqiptarët dhe deputeti Rexhep Ismail nga "E Majta". Përfaqësuesit e partive politike shqiptare e konsideruan mungesën e deputetëve maqedonas si të qëllimshme, ndërsa debati për këtë çështje është shtyrë për një kohë të pacaktuar. Anëtarët shqiptarë me të drejtë vote në komision janë Merita Koxhaxhiku dhe Skender Rexhepi, ndërsa Ilire Dauti ishte një nga propozuesit e rezolutës.