Milorad Dodik, president i partisë në pushtet në Republikën Srpska, ka cilësuar bashkëpunimin ushtarak midis Kroacisë, Shqipërisë dhe Kosovës si një kërcënim për entitetin dhe popullin serb, duke ndjekur retorikën e Beogradit zyrtar. Ai pretendon se kjo aleancë përbën një rrezik për stabilitetin e rajonit dhe për sigurinë e RS-së, duke theksuar se entiteti po “monitoron situatën”. Megjithatë, analistët dhe ekspertët e sigurisë në Bosnjë dhe Hercegovinë e vlerësojnë këtë si një taktike politike dhe jo si një kërcënim real, duke theksuar se përgjegjësia për mbrojtjen dhe sigurinë është në nivel shtetëror dhe se nuk ekziston asnjë skenar ku RS të kërcënohet veçmas. Deklaratat e Dodikut vlerësohen si përpjekje për të fituar pikë politike dhe për të forcuar narrativën e kërcënimit ndaj interesave serbe, sidomos në kontekstin e marrëdhënieve të tensionuara me Kroacinë dhe komponentin kroat brenda BiH-së. Ndërkaq, qeveritë e Kroacisë, Shqipërisë dhe Kosovës theksojnë se bashkëpunimi i tyre nuk synon krijimin e një aleance ushtarake dhe është pjesë e një strategjie përballimi të sfidave të sigurisë rajonale, ndërsa BiH po ecën drejt integrimit në NATO.