Gazetari kroat Domagoj Margetiq ka publikuar dokumente të brendshme dhe sekrete të Shërbimit të Sigurimit Shtetëror të Bosnjë-Hercegovinës, që tregojnë përfshirjen e Aleksandar Vuçiqit në koordinimin e snajperistëve të huaj gjatë Rrethimit të Sarajevës. Një dokument i datës 17 shkurt 1995, i lidhur me operacionin “Lovac” ose “Gjuetari”, e identifikon Vuçiqin si personin që organizonte ardhjen dhe pozicionimin e snajperistëve që qëllonin civilë në zona si Grbavica dhe Varrezat Hebraike. Materiali përmend gjithashtu se Vuçiq kalonte kufirin dhe lëvizte në territoret nën kontroll serb, duke përdorur një legjitimacion rezervisti të Shërbimit të Sigurimit Shtetëror të Serbisë, i lëshuar nga zëvendësdrejtori i DB-së së Serbisë, Frenki Simatoviq. Sipas dokumentit, aktivitetet e Vuçiqit vazhduan edhe pasi ai u kthye në Beograd dhe u zgjodh sekretar i përgjithshëm i Partisë Radikale Serbe.