Komuna e Dragashit ka reaguar pas protestave të qytetarëve për mungesën dhe ndërprerjet e furnizimit me ujë, duke shprehur mirëkuptim dhe gatishmëri për bashkëpunim me institucionet përgjegjëse. Kryetari Bexhet Xheladini dhe stafi i tij dolën para Komunës për të dëgjuar kërkesat e banorëve dhe për të theksuar nevojën për angazhim të përbashkët në zgjidhjen e problemit. Komuna ka sqaruar se përgjegjës për furnizimin me ujë është KRU “Hidroregjioni Jugor” dhe ka bërë thirrje për dialog dhe bashkëpunim ndërinstitucional për sigurimin e një furnizimi të qëndrueshëm. Pas premtimit për furnizim pa reduktime, protesta u ndërpre, ndërsa Komuna falënderoi Policinë e Kosovës për menaxhimin profesional të situatës.