Kryeministri Hristijan Mickoski shprehu habinë dhe shqetësimin e tij pas vendimit për ndërprerjen e hetimit ndaj 13 personave dhe një kompanie për prokurimin e mazutit në TEC Negotinë, me vlerë mbi 160 milionë euro. Ai paralajmëroi se do të parashtrojë ankesë dhe pret që rasti të kthehet në rishikim dhe analizë, duke theksuar se nëse kjo nuk ndodh, Prokuroria e Ndjekjes së Krimit të Organizuar do të humbasë kredibilitetin. Mickoski gjithashtu bëri të ditur se ka kontaktuar kryeprokurorin Nenad Saveski, i cili nuk ishte informuar për vendimin e marrë nga shefi i Prokurorisë për Ndjekjen e Krimit të Organizuar dhe Korrupsionit, Islam Abazi. Situata mbetet e paqartë, ndërsa pritshmëritë janë që pas ankesës së Elektranave të Maqedonisë së Veriut, hetimi të rifillojë.