Një delegacion i Akademisë së Kosovës për Siguri Publike (AKSP) zhvilloi një vizitë studimore në Universitetin e Zjarrfikjes në Varshavë, Poloni, nga 18 deri më 22 maj 2026, në kuadër të programit Erasmus+ të Bashkimit Evropian. Gjatë qëndrimit, përfaqësuesit prezantuan gjendjen dhe arritjet e AKSP-së, ndërsa ndoqën prezantime nga institucione të ndryshme nga Polonia, Ukraina dhe Uzbekistani. Ata vizituan njësitë zjarrfikëse, laboratorë të specializuar dhe qendra trajnimi, duke marrë njohuri të thelluara për sistemet dhe metodat polake të shpëtimit dhe trajtimit emergjent. Partnerët polakë shprehën gatishmërinë për të ndarë ekspertizën e tyre dhe për të bashkëpunuar në zhvillimin e sektorit të sigurisë në Kosovë.