Presidenti i Serbisë, Aleksandar Vuçiq, njoftoi se gjatë një hetimi u gjetën dy pako me eksplozivë dhe fitila pranë tubacionit të gazit Balkan Stream në veri të Serbisë, afër kufirit me Hungarinë. Ai informoi kryeministrin hungarez, Viktor Orban, i cili konfirmoi gjetjen dhe njoftoi se ka thirrur një mbledhje të jashtëzakonshme të Këshillit të Mbrojtjes për të diskutuar situatën. Autoritetet serbe po kryejnë kontrolle intensive në zonë me përdorimin e dronëve, qenve nuhatës dhe pajisjeve të tjera teknologjike, ndërsa hetimi për identifikimin e përgjegjësve vazhdon. Vuçiq theksoi se qëllimi i këtij akti ishte dërgimi i një mesazhi politik dhe paralajmëroi ndëshkimin e ashpër të autorëve, duke nënvizuar se agjencitë e inteligjencës kanë bërë një punë të mirë në zbardhjen e ngjarjes.