Ali Ahmeti dhe Ziadin Sela takuan kongresmenin amerikan Keith Self në Prishtinë për të diskutuar zhvillimet politike në Maqedoninë e Veriut dhe sfidat që lidhen me ruajtjen e karakterit multietnik të shtetit. Në fokus ishte shqetësimi për erozionin e Marrëveshjes së Ohrit, e cila mbetet themeli i paqes dhe bashkëjetesës në vend, si dhe një investim strategjik i SHBA-ve në rajon. Ahmeti vlerësoi mbështetjen amerikane për stabilitetin dhe orientimin euro-atlantik të Maqedonisë së Veriut dhe Ballkanit Perëndimor, ndërsa u theksua nevoja për mbrojtjen e standardeve demokratike dhe respektimin e marrëveshjes si parakusht për stabilitet afatgjatë dhe integrim evropian. Ziadin Sela përmes rrjeteve sociale theksoi regresin dhe ngecjen në shumë fusha gjatë periudhës së fundit, duke vlerësuar rëndësinë e mbështetjes amerikane për paqen dhe kohezionin ndëretnik në rajon.