Eurodeputetja italiane Cristina Guarda mori pjesë në protestën kundër qeverisë shqiptare që po vazhdon prej 42 ditësh në Tiranë dhe në mbledhjen ndërparlamentare të Delegacionit BE–Shqipëri. Ajo ngriti shqetësime serioze për mbrojtjen e mjedisit dhe respektimin e standardeve europiane, duke theksuar se interesat ekonomike po vihen shpesh mbi ruajtjen e natyrës dhe mirëqenien e komuniteteve lokale. Guarda përqendroi vëmendjen te zona e mbrojtur Vjosa–Nartë, duke e cilësuar si një rast problematik që kërkon reflektim politik dhe respekt ndaj vlerave europiane. Sipas saj, anëtarësimi i Shqipërisë në Bashkimin Europian duhet të bazohet në mbrojtjen e mjedisit, aktivizimin e komunitetit dhe pjesëmarrjen e qytetarëve në vendimmarrje, duke respektuar parimin e “mosregresit” në këtë fushë.