Ministria e Punëve të Jashtme e Maqedonisë po organizon evakuimin e mbi 500 shtetasve nga zonat e krizës në Lindjen e Mesme, duke përfshirë Emiratet e Bashkuara Arabe, Katarin, Kuvajtin, Bahreinin dhe Arabinë Saudite. Deri më tani janë evakuuar me sukses 151 persona nga Dubai, ndërsa evakuimi i të tjerëve pritet të përfundojë deri në mesin e javës, me prioritet për gratë, fëmijët, turistët dhe personat pa vendbanim të përhershëm në zonat e rrezikshme. Ministri Timço Mucunski theksoi se 14 persona, të cilët kishin kërkuar evakuim, nuk u paraqitën në Aeroportin e Dubait, por falë një liste pritjeje dhe koordinimit me ambasadën në Abu Dhabi, vendet e tyre u zëvendësuan nga qytetarë të tjerë të gatshëm për udhëtim. Fluturimet do të organizohen edhe nga Doha, Kuvajti, Bahreini dhe Arabia Saudite, ku transporti lokal do të bëhet përmes Riyadhit, dhe të gjitha shpenzimet do të mbulohen nga Qeveria e Maqedonisë.