Partia opozitare E Majta në Maqedoninë e Veriut ka kritikuar ashpër mënyrën e faturimit të energjisë elektrike, duke theksuar se qytetarët vazhdojnë të marrin fatura bazuar në konsum të supozuar, edhe pse ligji i ri energjetik premtonte eliminimin e kësaj praktike. Sipas E Majtës, leximi real i matësit nuk është i detyrueshëm çdo muaj, dhe kur mungon ai, faturat përgatiten sipas supozimeve, me barazim të mëvonshëm, duke krijuar një barrë financiare të padrejtë për konsumatorët. Partia akuzon pushtetin dhe institucionet rregullatore për mosveprim dhe për të mbrojtur monopolin e EVN, i cili nuk ndëshkohet për mosleximin e matësve, ndërsa qytetarët përballen me penalitete dhe ndërprerje energjie në rast vonese pagesash. E Majta kërkon që faturat të bazohen vetëm në lexim real, të vendosen penalitete për operatorin në rast mosveprimi, të rritet transparenca dhe të nisë procesi i rikthimit të infrastrukturës energjetike në pronësi publike.