Në Ferizaj është themeluar Qendra për Zhvillim Rajonal, një iniciativë që përfshin komunat e Rajonit të Ferizajt dhe synon të përmirësojë koordinimin e projekteve zhvillimore dhe investimeve strategjike. Në ceremoninë e themelimit morën pjesë zëvendësministrat e Zhvillimit Rajonal dhe Administrimit të Pushtetit Lokal, si dhe përfaqësues të komunave dhe drejtorive për zhvillim ekonomik dhe turizëm. Kryetari i Komunës së Ferizajt, Agim Aliu, theksoi se kjo qendër do të shërbejë si mekanizëm institucional për bashkëpunim më të ngushtë ndërmjet komunave dhe do të krijojë mundësi të reja për zhvillim ekonomik në rajon. Kjo nismë pritet të fuqizojë realizimin e projekteve me interes të përbashkët dhe të sjellë zhvillim të qëndrueshëm në Rajonin e Ferizajt.