Agjencia e Ushqimit dhe Veterinarisë (AUV) ka bërë një apel urgjent për të gjithë fermerët që mbarështojnë derra, duke kërkuar rritjen e masave të biosigurisë për të parandaluar përhapjen e Mortajës Afrikane të Derrave (ASF). Megjithëse në Kosovë nuk është regjistruar ende asnjë rast, situata epidemiologjike në vendet e rajonit është përkeqësuar dhe rreziku mbetet i lartë. AUV rekomandon që fermerët të mos përdorin mbetje ushqimore për ushqimin e derrave dhe të blejnë kafshë vetëm nga ferma të regjistruara me dokumentacion veterinar, si dhe të raportojnë menjëherë çdo shenjë të pazakontë tek veterineri. Agjencia thekson se ASF nuk transmetohet te njerëzit, por është shumë ngjitëse për derrat dhe mund të shkaktojë dëme ekonomike të mëdha në sektorin e blegtorisë nëse nuk respektohen masat e parandalimit.