Pika e Kalimit Kufitar të Morinës ka regjistruar një fluks të jashtëzakonshëm udhëtarësh dhe automjetesh nga Kosova drejt Shqipërisë gjatë javës së fundit të gushtit. Sipas të dhënave zyrtare, në periudhën 24-30 gusht, mbi 203 mijë qytetarë dhe më shumë se 61 mijë automjete kanë kaluar kufirin, duke shënuar një nga periudhat më intensive të sezonit veror. Kjo lëvizje e madhe lidhet me ditët e fundit të pushimeve dhe përgatitjet për nisjen e vitit të ri shkollor në Kosovë më 1 shtator. Gjatë muajve maj, qershor dhe korrik, rreth 1.43 milionë qytetarë të Kosovës kanë zgjedhur bregdetin shqiptar për pushime, ndërsa tani pritet që fluksi të ndryshojë drejtim me kthimin masiv të pushuesve në vendin e tyre.