Ditët e fundit të gushtit kanë sjellë një rritje të ndjeshme të fluksit të automjeteve nga Kosova drejt Shqipërisë, me destinacion kryesor bregdetin shqiptar për pushimet e fundit të sezonit veror. Në pikën kufitare të Morinit, si dhe përgjatë Rrugës së Kombit, veçanërisht në segmentin nga Morini deri te Pika e Pagesës, qarkullimi është shtuar dukshëm, duke krijuar kolona të gjata dhe një ngarkesë të madhe trafiku. Për të përballuar këtë situatë, në Morinë janë vënë në funksion të gjitha sportelet e mundshme, ndërsa edhe në Pikën e Pagesës po punohet me kapacitet të plotë për të shmangur radhët dhe për të garantuar një lëvizje sa më të shpejtë. Fluksi i lartë pritet të vazhdojë edhe gjatë orëve në vijim, pasi shumë qytetarë nga Kosova zgjedhin të shfrytëzojnë ditët e fundit të sezonit veror në plazhet shqiptare.