Gjatë fundjavës së fundit të korrikut, Pika e Kalimit Kufitar Morinë ka regjistruar një rritje të ndjeshme të hyrjeve të qytetarëve të Kosovës drejt Shqipërisë, duke arritur numrin më të lartë të sezonit veror deri më tani. Në periudhën nga 25 korriku ora 05:00 deri më 26 korrik ora 08:30, janë regjistruar mbi 45,500 shtetas kosovarë dhe rreth 12,800 automjete që kanë kaluar kufirin. Kjo rritje lidhet ngushtë me afrimin e muajit gusht dhe nisjen e pushimeve vjetore, si dhe me ardhjen e diasporës kosovare që zgjedh të kalojë verën në destinacionet turistike shqiptare. Autoritetet kufitare në Morinë janë vënë në gatishmëri, duke funksionuar me kapacitet të plotë dhe duke zbatuar procedura të përshpejtuara për të menaxhuar fluksin e madh të udhëtarëve dhe automjeteve, ndërsa pritet që ky trend të vazhdojë edhe në javët në vijim.