Kryetari i Kuvendit të Maqedonisë së Veriut, Afrim Gashi, zhvilloi një takim me ushtruesen e detyrës së ambasadores së SHBA-së në vend, Nicole Varnes, ku diskutuan për proceset reformuese dhe forcimin e partneritetit strategjik ndërmjet dy vendeve. Gashi theksoi përkushtimin e Kuvendit ndaj reformave që lidhen me integrimin evropian dhe bashkëpunimin me partnerët ndërkombëtarë për avancimin e standardeve demokratike dhe institucionale. Një nga temat kryesore ishte digjitalizimi i proceseve parlamentare, i cili u vlerësua si një element kyç për rritjen e funksionalitetit, transparencës dhe sigurisë institucionale. Kryeparlamentari shprehu mirënjohje për mbështetjen e vazhdueshme të SHBA-ve dhe riafirmoi rëndësinë e aleancës në forcimin e demokracisë, stabilitetit dhe perspektivës euroatlantike të Maqedonisë së Veriut.