Kryeministri i Shqipërisë, Edi Rama, ka akuzuar një grup protestuesish në kryeqytet për lidhje me interesa të huaja, duke publikuar fotografi të Igballe Hudutit, një nga pjesëmarrëset në protestën për projektin në Zvërnec. Rama e ka paraqitur Hudutin si një personazh me lidhje pro-iraniane, duke e shfaqur atë në një foto pranë ish-presidentit iranian Mahmoud Ahmadinejad dhe duke e përshkruar si pjesë të një "diaspore të shtirur" që predikon urrejtje dhe thërret për kryengritje. Ai ka përmendur gjithashtu lidhje me figura të njohura të regjimit iranian, duke e cilësuar këtë rrjet si kërcënim për Shqipërinë dhe aleancat e saj ndërkombëtare. Huduti, e njohur në Kosovë për aktivitetin e saj në fushën fetare dhe mediatike, ka qenë gjithashtu në qendër të vëmendjes për përpjekjen e saj për të marrë pjesë në Big Brother VIP Kosova, e cila nuk u realizua për arsye familjare.