Kryetari i Kuvendit të Shqipërisë, Niko Peleshi, zhvilloi një vizitë zyrtare në Senatin e Francës, ku u prit nga Presidenti i Senatit, Gérard Larcher. Takimi u fokusua në forcimin e bashkëpunimit ndërparlamentar dhe thellimin e partneritetit strategjik mes Shqipërisë dhe Francës, me theks të veçantë në procesin e integrimit europian të Shqipërisë. Presidenti Larcher rikonfirmoi mbështetjen e Francës për Shqipërinë dhe vlerësoi progresin e shpejtë drejt anëtarësimit në Bashkimin Europian, duke e cilësuar këtë fazë si një “sprint të fundit drejt BE-së”. Kryetari Peleshi theksoi rëndësinë e forcimit të sundimit të ligjit, luftës kundër krimit të organizuar dhe korrupsionit, si dhe rolin stabilizues të Shqipërisë në rajon, duke riafirmuar mbështetjen për dialogun Kosovë-Serbi dhe orientimin euroatlantik të vendit.