Pjesëtarët e Forcës së Sigurisë së Kosovës (FSK) kanë përfunduar me sukses trajnimin e zhytjes në Shqipëri, në kuadër të bashkëpunimit bilateral me Forcat e Armatosura të Republikës së Shqipërisë. Trajnimi u zhvillua në Qendrën Kombëtare të Polumbarëve në Pashaliman, Vlorë, dhe kishte për qëllim rifreskimin dhe avancimin e njohurive profesionale në teknikat moderne të zhytjes dhe sigurinë nënujore. Gjatë programit, pjesëtarët e FSK-së u fokusuan në planifikimin dhe realizimin e operacioneve të zhytjes, kontrollin e lundrueshmërisë, sistemin buddy, si dhe zhvillimin e aftësive për mësimdhënie dhe demonstrim praktik. Ky trajnim ka forcuar kapacitetet profesionale të FSK-së për misionet e kërkim-shpëtimit dhe operacionet e specializuara nënujore, duke rritur kështu gatishmërinë dhe efektivitetin e forcave në këtë fushë.