Forca e Sigurisë së Kosovës ka avancuar kapacitetet operacionale të Policisë Ushtarake përmes një kursi të specializuar të organizuar në bashkëpunim me Policinë Ushtarake të Kroacisë. Ky trajnim përfshiu modulet për intervenime të shpejta, kontroll të turmave dhe luftime në hapësira të mbyllura, duke rritur aftësitë taktike dhe operacionale të pjesëtarëve të Policisë Ushtarake. Ministri i Mbrojtjes, Ejup Maqedonci, theksoi se pjesëmarrësit treguan profesionalizëm, disiplinë dhe gatishmëri të lartë gjatë këtij trajnimi intensiv. Ky bashkëpunim ndërkombëtar është pjesë e transformimit të vazhdueshëm të Policisë Ushtarake në një njësi moderne, të përgatitur për sfidat e sigurisë së kohës sonë.