Forca e Sigurisë së Kosovës (FSK) po merr pjesë në ushtrimin ndërkombëtar “Mittelmark 2026” që po zhvillohet në Gjermani, duke bashkëpunuar me shtetet partnere dhe integruar në strukturat e ushtrisë gjermane. Në këtë aktivitet, FSK operon me një skuadër transporti nga Komanda e Logjistikës, duke realizuar operacione në fushën e transportit dhe mbështetjes logjistike në klasat I, III dhe V. Ministri i Mbrojtjes, Ejup Maqedonci, ka theksuar se kjo pjesëmarrje dëshmon angazhimin e Kosovës për forcimin e bashkëpunimit ndërkombëtar dhe avancimin e kapaciteteve mbrojtëse. Ai gjithashtu vuri në dukje se FSK po tregon profesionalizëm dhe ndërveprueshmëri të lartë, duke rikonfirmuar përkushtimin e Kosovës si partner i besueshëm në operacionet shumëkombëshe dhe në arkitekturën euroatlantike të sigurisë.